Duo Latine loquentium conventicula ductu et auspiciis societatis nostrae per Rete universale anno bis millesimo vicesimo sexto celebrabuntur

I. Latine loqui incipiamus! Hoc conventiculum tironibus destinatum anno bis millesimo vicesimo quinto a mensis Iunii die vicesimo altero (22) usque ad diem vicesimum quintum (25) per Rete universale celebrabitur.

Hoc conventiculum 'tironibus' destinabitur, h. e. hominibus nondum ulla Latine loquendi exercitatione assuefactis. Attamen neminem oportebit aditum in hoc conventiculum - etsi tironibus destinatum - petere, quin scripta Latina aliquo saltem modo legere possit, verborumque constructionem maxima ex parte intellegat.

DE DIE PETITIONIBUS ACCIPIENDIS DICTA

Quaesumus ut omnes, quicumque huic conventiculo interesse constituerint, pecuniam pro aditu ad mensis Mai diem quintum decimum (15) persolvant. At quo quis maturius rogaverit ut in conventiculum conscribatur, eo verisimilius erit locum ei dari posse.  Nam nobis haud plus TRIGINTA homines in hoc conventiculum admittere licebit.

DE PRETIO ADEUNDI

Rogamus ut unus quisque eorum, qui huic conventiculo (quod est tironibus destinatum) interesse voluerint, thaleros nobis centenos vicenos ($120) persolvat, ut aditum in conventiculum habeat. Si quis, adeundi pretio iam exsoluto et in conventiculorum fisco collocato, conventiculi adeundi consilium postea mutaverit, pecuniam pro aditu datam ei restituere non poterimus.

Omnes, qui huic conventiculo interesse meditamini, ad Terentium Tunberg, linguae Latinae professorem scribatis oportet, cuius est haec inscriptio cursualis electronica: terence.tunberg@gmail.com

II. Conventiculum aestivum anno bis millesimo vicesimo sexto a mensis Iulii die duodetricesimo (28) usque ad mensis Augusti diem tertium (3) per Rete universale celebrabitur.

Conventiculum aestivum hominibus destinabitur, qui non solum scripta Latina aliquo modo legere possunt verborumque constructionem maxima ex parte intellegunt, sed etiam quandam Latine loquendi peritiam adepti sunt, etsi non magnam (i.e. ominibus, qui antea semel saltem bisve in Latine loquentium coetibus versati sunt). Sed gratissimi etiam ad hoc conventiculum venient homines iam usu loquendi satis exercitati, qui occasionem cum aliis loquendi et eloquentiae perpoliendae quaerunt aptam atque opportunam.

DE DIE PETITIONIBUS ACCIPIENDIS DICTA

Quaesumus ut omnes, quicumque conventiculo aestivo interesse constituerint, pecuniam pro aditu ad DIEM MENSIS IUNII QUINTUM DECIMUM (15) persolvant. At quo quis maturius rogaverit ut in conventiculum conscribatur, eo verisimilius erit locum ei dari posse. Nam nobis haud plus VIGINTI QUINQUE homines in hoc conventiculum aestivum admittere licebit.

DE PRETIO ADEUNDI

Rogamus ut unus quisque eorum, qui conventiculo aestivo interesse voluerint, thaleros nobis centenos octogenos ($180) persolvat, ut aditum in conventiculum habeat. Si quis, adeundi pretio iam exsoluto et in conventiculorum fisco collocato, conventiculi adeundi consilium postea mutaverit, pecuniam pro aditu datam ei restituere non poterimus.

Omnes, qui conventiculo aestivo interesse meditamini, ad Terentium Tunberg linguae Latinae professorem scribatis oportet, cuius est haec inscriptio cursualis electronica: terence.tunberg@gmail.com.

DE CONVENTICULIS NOSTRIS

Eo in primis proposito ad conventicula nostra veniunt tot homines tam iuvenes quam aetate provecti, ut peritiam aliquam ex tempore et Latine de multis argumentis sermocinandi adipiscantur. Id tantum in ipsis sessionibus agitur ut conventiculi participes facultate Latine loquendi, audiendi, intellegendi, scribendi assuefiant. Non solum disseritur et disputatur de litteris deque libris, sed argumenta quoque nostra ad res cottidianas, familiares, domesticas spectant.

Huiusmodi conventicula linguam Latinam discere iam ingredientibus nec ultra elementa prima progressis haud sunt idonea. Itaque invitantur illi qui monumenta scripta aliquo saltem modo legere queant, qui verborum constructionem intellegant legesque grammaticas maxima ex parte compertas habeant.

Credimus sessiones nostras non solum artium liberalium professoribus, sed etiam omnibus, qui aliquam Latine sermocinandi, disputandi, scribendi facultatem consequi cupiant, magno fore subsidio et emolumento. Prosunt conventicula nostra vel illis qui Latine loqui et scribere sciant, sed occasionem expetant facundiae exercendae commodam et iucundam. Denique, id quod haud minimi momenti videtur, saepe iis usu venit, qui nostris interfuerunt sessionibus, ut postea inveniant scripta sese Latina quodammodo facilius, citius, melius legere et intellegere posse - idque multo maiore cum fructu.

Neque praetermittendum est illud, quod dirigentur colloquia nostra ad normas loquendi et dicendi, quas secuti sunt auctores probati, qui ‘aurei’ et ‘argentei’ nonnumquam appellantur, quorum sermo ad omne argumentum mirum in modum accommodatus atque elegantia quadam insignis esse videatur. Multum temporis in scriptis auctorum Latinitatis Latine explicandis collocare solemus, ut et colloquia nostra sermone auctorum quodammodo ditentur et colloquiis nostris ad scripta Latina intellegenda iuvemur.

Ad vocabula scilicet in linguam Latinam aetate recentiore inducta confugiendum aliquando est. Hac in re praecones litterarum renatarum optimos, qualis fuit Laurentius Valla, qualis Erasmus Roterodamus, qualis Marcus Antonius Muretus, quales alii permulti, imitari volumus, qui ut Latine loquendi proprietates antiquas servare studebant, ita vocabula quaedam recentiore aevo nata, cum opus fuerat, non gravate usurpabant. Fontes igitur quidam in conventiculo aperientur unde sodales nostri verba recentiora commode mutuentur. Praeterea quibus sermonibus conveniant vocabula recentiora novatave, quibus sufficiant antiqua, omnes una et coniunctim considerabimus.

Oportet sciatis, lectores, sessiones unius cuiusque conventiculi die etiam primo inde a tempore matutino (secundum horas in plaga Americae septentrionalis orientali usitatas) usque ad horas vespertinas, aliquot pausis interiectis, celebratum iri.

Et ecce! - conventicula nostra, quotquot anno 2026 celebranda curaverimus, per Rete omnium gentium electronicum fient, ut homines multis e gentibus oriundi magnisque locorum intervallis disiuncti, nullis tamen itineribus susceptis et in eodem collocati quasi theatro (quale est illud, quod ZOOM appellatur) colloquia inter se commode serere possint.